എ.കെ.ജി ക്ലബ്ബിനു മുന്നില്‍ മുത്തപ്പന്‍ തെയ്യംകെട്ടിയതിന്‌ സി.പി.എം.പ്രവര്‍ത്തകരോട്‌ പാര്‍ട്ടി വിശദീകരണം ആവശ്യപ്പെട്ടു

കാഞ്ഞങ്ങാട്‌ : പുല്ലൂര്‍ പെരിയപഞ്ചായത്ത്‌ പരിധിയിലെ അമ്പലത്തറ കുമ്പളയില്‍ എ.കെ.ജി.ക്ലബ്ബിനു മുന്നില്‍ മുത്തപ്പന്‍തെയ്യം കെട്ടിയതിന്‌ പാര്‍ട്ടി നേതൃത്വം സി.പി.എം പ്രവര്‍ത്തകരോട് വിശദീകരണം തേടി. കഴിഞ്ഞദിവസമാണ്‌ ക്ലബ്ബിനു മുന്നില്‍ മുത്തപ്പന്‍ തെയ്യം കെട്ടിയാടിയത്‌. ക്ലബ്ബിന്റെ പല പ്രവര്‍ത്തനങ്ങളും തടസ്സപ്പെടുന്നതിനാല്‍ ക്ലബ്ബ്‌ ഭാരവാഹികള്‍ ചേര്‍ന്ന്‌ ജോത്സ്യനെ കണ്ട്‌ പ്രശ്‌നപരിഹാരം തേടിയപ്പോഴാണ്‌ തടസ്സങ്ങള്‍ മാറികിട്ടാന്‍ മുത്തപ്പന്‍ തെയ്യം കെട്ടിയാടിക്കണമെന്ന്‌ നിര്‍ദ്ദേശിച്ചത്. ഇതിന്റെ അടിസ്ഥാനത്തിലാണ്‌ എ.കെ.ജി.ക്ലബ്ബിനു മുന്നില്‍ പ്രവര്‍ത്തകര്‍ പന്തലിട്ട് മുത്തപ്പന്‍ തെയ്യം കെട്ടിയത്‌. വിവരം പാര്‍ട്ടി നേതൃത്വം അറിഞ്ഞതോടെയാണ്‌ ക്ലബ്ബ്‌ ഭാരവാഹികളായ പാര്‍ട്ടി അംഗങ്ങളില്‍ നിന്നും ഇതു സംബന്ധിച്ച്‌ വിശദീകരണം ആവശ്യപ്പെട്ടിട്ടുള്ളത്‌. കണ്ണൂര്‍ജില്ലയിലെ പിലാത്തറയിലും നേരത്തെ സമാനമായ രീതിയിള്ള സംഭവം നടന്നിരുന്നു. പിലാത്തറ ഓട്ടോസ്‌റ്റാന്റിലെ ഓട്ടോതൊഴിലാളികളായ സി.ഐ.ടി.യു.പ്രവര്‍ത്തകര്‍ ചേര്‍ന്നാണ്‌ മുത്തപ്പന്‍ തെയ്യം നടത്തിയത്. ഓട്ടോ സ്റ്റാന്റില്‍ പള്ളിയറ കെട്ടി മുത്തപ്പന്‍ കെട്ടുന്നത് പാര്‍ട്ടി നേതൃത്വം തടഞ്ഞതിന്റെ പേരില്‍ സി.ഐ.ടിയുവില്‍ നിന്ന് നിരവധിപേര്‍ രാജിവെച്ചിരുന്നു.