കാഞ്ഞങ്ങാട്‌ നഗരസഭാ ചെയര്‍മാന്‍ ഔദ്യോഗിക കാറില്‍ വിവാഹത്തില്‍ പങ്കെടുത്തത്‌ വിവാദമായി

കാഞ്ഞങ്ങാട്‌: കാഞ്ഞങ്ങാട്‌ നഗരസഭാ ചെയര്‍മാന്‍ അഡ്വ. എന്‍.എ. ഖാലിദ്‌ ഔദ്യോഗിക കാറില്‍ കര്‍ണ്ണാടക ബെല്‍ത്തങ്ങാടിയില്‍ വിവാഹത്തില്‍ പങ്കെടുക്കാന്‍ പോയത്‌ വിവാദമാകുന്നു. ഞായറാഴ്‌ച്ച രാവിലെ 8 മണിക്കാണ്‌ കാഞ്ഞങ്ങാട്‌ ബാവ നഗറിലെ ഖത്തീബിന്റെ വിവാഹത്തില്‍ സംബന്ധിക്കാന്‍ ഔദ്യോഗിക വാഹനത്തില്‍ പുറപ്പെട്ടത്‌. അദ്ദേഹത്തിന്റെ ചില സുഹൃത്തുക്കളും നഗരസഭയുടെ ഔദ്യോഗിക വാഹനത്തില്‍ ചെയര്‍മാനോടൊപ്പം ഉണ്ടായിരുന്നതായും നാട്ടുകാര്‍ പറയുന്നു. ബര്‍ത്തങ്ങടിയിലെ ആശിര്‍വാദ്‌ ഓഡിറ്റോറിയത്തിലാണ്‌ ഖത്തീബിന്റെ വിവാഹം നടന്നത്‌. നഗരസഭയുടെ ഔദ്യോഗിക വാഹനം ദുരുപയോഗം ചെയ്യുന്നതിനെതിരെ നേരത്തെ തന്നെ വ്യാപകമായ പ്രതിഷേധം നിലനില്‍ക്കവെയാണ്‌ ചെയര്‍മാന്‍ ഔദ്യോഗിക എ.സി കാറില്‍ കിലോമീറ്ററോളം അകലെയുള്ള സ്ഥലത്തേക്ക്‌ പോയത്‌. നേരത്തെ ചെയര്‍മാന്റെ മകളെ ഔദ്യോഗിക കാറില്‍ സ്‌കൂളില്‍ കൊണ്ടു വിടുന്നത്‌ ഡി.വൈ.എഫ്‌.ഐ പ്രവര്‍ത്തകര്‍ തടഞ്ഞത്‌ വിവാദമായിരുന്നു. പോലീസിന്റെ ഇടപെടല്‍ മൂലമായിരുന്നു അന്ന്‌ പ്രശ്‌നങ്ങള്‍ ഒഴിവായത്‌.