അതിഞ്ഞാല്‍-കോട്ടച്ചേരി റോഡില്‍ ദുരിതയാത്ര

അജാനൂര്‍: കനത്ത മഴയെത്തുടര്‍ന്ന് തകര്‍ന്ന അതിഞ്ഞാല്‍-കോട്ടച്ചേരി റോഡില്‍ ഗതാഗതം ദുസഹമായി. കാഞ്ഞങ്ങാട്-കാസര്‍കോട് സംസ്ഥാന പാതയില്‍ അതിഞ്ഞാല്‍ മുതല്‍ നോര്‍ത്ത് കോട്ടച്ചേരി വരെയുള്ള റോഡിലെ തകര്‍ന്ന കുഴികളാണ് വാഹനയാത്രക്കാര്‍ക്കും കാല്‍നടക്കാര്‍ക്കും ദുരിതമായി മാറിയത്.ജൂണ്‍ ആദ്യവാരത്തില്‍ ടാറിങ് നടത്തിയ റോഡ് പൊട്ടിപ്പൊളിഞ്ഞ് കരിങ്കല്ല് മെറ്റലുകള്‍ ഇളകിയ നിലയിലാണുള്ളത്. മഴ പെയ്താല്‍ റോഡിലെ കുഴികളില്‍ വെള്ളം കെട്ടിനില്‍ക്കുകയും അപകടസാധ്യതയേറുകയും ചെയ്യുന്നു. കഴിഞ്ഞദിവസം രാത്രി മൂന്ന് യാത്രക്കാരുമായി പോകുകയായിരുന്ന ഓട്ടോറിക്ഷ ഇഖ്ബാല്‍ ജങ്ഷനില്‍ കുഴികളില്‍ വീണ് നിയന്ത്രണംവിട്ടെങ്കിലും ഭാഗ്യംകൊണ്ട് മറിയാതെ രക്ഷപ്പെട്ടു. തിങ്കളാഴ്ച രാത്രി സ്‌കൂട്ടര്‍ യാത്രക്കാരനായ വിദ്യാര്‍ഥി അപകടത്തില്‍പെട്ടിരുന്നു.നോര്‍ത്ത് കോട്ടച്ചേരി, ഇഖ്ബാല്‍ ജങ്ഷന്‍, പത്മ ജങ്ഷന്‍ എന്നിവിടങ്ങളിലും അജാനൂര്‍ തെക്കേപ്പുറത്തുമാണ് അപകടകരമായ രീതിയില്‍ റോഡ് തകര്‍ന്നിരിക്കുന്നത്.