യു.ഡി.എഫുമായി അടുക്കാനുള്ള ഐ.എന്‍.എല്ലിന്റെ തീരുമാനത്തില്‍ ഐ.എം.സി.സിക്ക് എതിര്‍പ്പ്

കുവൈത്ത് സിറ്റി: എല്‍.ഡി.എഫ് ബന്ധം വിഛേദിച്ച് യു.ഡി.എഫുമായി അടുക്കാനുള്ള ഇന്ത്യന്‍ നാഷണല്‍ ലീഗിന്റെ (ഐ.എന്‍.എല്‍) നീക്കത്തിനെതിരെ പാര്‍ട്ടിയുടെ പോഷക സംഘടനയായ ഇന്ത്യന്‍ മുസ്ലിം കള്‍ച്ചറല്‍ സെന്ററിന്റെ (ഐ.എം.സി.സി) കുവൈത്ത് ഘടകത്തിലെ ഒരു വിഭാഗം രംഗത്ത്. യു.ഡി.എഫുമായി ചേരുകയാണെങ്കില്‍ ഐ.എം.സി.സി കുവൈത്ത് ഘടകം ഐ.എന്‍.എല്ലുമായുള്ള ബന്ധം വിഛേദിക്കാനാണ് തീരുമാനം. മുന്‍പ്രസിഡന്റ് സത്താര്‍ കുന്നിലിന്റെ നേതൃത്വത്തിലുള്ള വിഭാഗമാണ് യു.ഡി.എഫ് ബന്ധത്തെ എതിര്‍ക്കുന്നത്. യു.ഡി.എഫുമായി ചേരുകയാണെങ്കില്‍ മഹ്ബൂബെ മില്ലത്ത് കള്‍ച്ചറല്‍ ഫോറം രൂപവത്കരിച്ച് പാര്‍ട്ടിയില്‍ വേറിട്ട് നില്‍ക്കാനാണ് തീരുമാനമെന്ന് സത്താര്‍ കുന്നില്‍ പറഞ്ഞു. നിലവിലെ കമ്മിറ്റിയിലെ പ്രധാന ഭാരവാഹികള്‍ ഉള്‍പ്പെടെ തങ്ങള്‍ക്കൊപ്പമാണെന്നും സത്താര്‍ അവകാശപ്പെട്ടു. കഴിഞ്ഞ കുറെ വര്‍ഷങ്ങളായി ഇടതുപക്ഷത്ത് നിലയുറപ്പിച്ചിരിക്കുന്ന ഐ.എന്‍.എല്ലിന് മുന്നണി പ്രവേശം പോലും അനുവദിക്കാത്ത എല്‍.ഡി.എഫിന്റെ നിലപാടില്‍ അമര്‍ഷമുണ്ടെങ്കിലും അതിന്റെ പേരില്‍ മാത്രം യു.ഡി.എഫില്‍ ചേരുന്നത് പാര്‍ട്ടിയുടെ ആശയത്തെ ബലികഴിക്കലാണെന്നാണ് ഈ വിഭാഗത്തിന്റെ നിലപാട്.