ബേക്കലില്‍ എയര്‍ സ്ട്രിപ്പ് നിര്‍മിക്കും -മന്ത്രി

തിരുവനന്തപുരം: ആസൂത്രിത ടൂറിസം വികസനം ലക്ഷ്യമിട്ട് കാസര്‍കോട് ജില്ലയിലെ ബേക്കലില്‍ എയര്‍സ്ട്രിപ്പ് നിര്‍മിക്കുമെന്ന് മന്ത്രി കോടിയേരി ബാലകൃഷ്ണന്‍ അറിയിച്ചു. ബേക്കല്‍ ടൂറിസം വികസന ഏജന്‍സിയും ഹോട്ടലുടമകളും ചേര്‍ന്ന് ഇതിനായി കമ്പനി രൂപവത്കരിക്കും. എയര്‍സ്ട്രിപ്പിനുള്ള സര്‍വേ പൂര്‍ത്തിയായി. സ്ഥലമെടുക്കുന്നതിനുള്ള വിശദാംശങ്ങള്‍ ഹാജരാക്കാന്‍ ജില്ലാ കലക്ടറോട് ആവശ്യപ്പെട്ടിട്ടുണ്ട്. നിലവില്‍ കണ്ടെത്തിയ സ്ഥലത്ത് തന്നെയായിരിക്കും നിര്‍മാണം. മന്ത്രിസഭയുടെ അനുമതിയോടെ തുടര്‍നടപടികളെടുക്കുമെന്നും കെ.വി. കുഞ്ഞിരാമന്റെ സബ്മിഷന് മന്ത്രി മറുപടി നല്‍കി.നിലവില്‍ മംഗലാപുരം വിമാനത്താവളത്തില്‍ നിന്ന് ഹെലികോപ്ടറില്‍ സഞ്ചാരികളെ ബേക്കലില്‍ എത്തിക്കുന്നുണ്ട്. 50 പേര്‍ക്ക് യാത്ര ചെയ്യാവുന്ന ചെറുവിമാനം ഇറക്കാന്‍ കഴിയുന്ന എയര്‍സ്ട്രിപ്പാണ് ഉദ്ദേശിക്കുന്നത്.