കാഞ്ഞങ്ങാട്: ചിത്താരി കടപ്പുറത്ത് വന്‍ ചെമ്മീന്‍ ചാകര. ലക്ഷക്കണക്കിന് രൂപയുടെ ചെമ്മീനുകളാണ് ഇന്ന് ലഭിച്ചത്. രാവിലെ മുതല്‍ മത്സ്യബന്ധനത്തിന് പോയ മത്സ്യത്തൊഴിലാളികള്‍ക്കെല്ലാം ഇന്ന് ലഭിച്ചത് ചെമ്മീനുള്‍ മാത്രമാണ്. വൈകുന്നേരമായിട്ടും ചെമ്മീനുകള്‍ യഥേഷ്ടം ലഭിക്കുന്നുണ്ട്. 50 ലക്ഷം രൂപയുടെയെങ്കിലും ചെമ്മീന്‍ ലഭിച്ചിട്ടുണ്ടാകുമെന്നാണ് കരുതപ്പെടുന്നത്. ലഭിച്ച ചെമ്മീനുകളില്‍ ഭൂരിഭാഗവും മറ്റ് പ്രദേശങ്ങളിലേക്ക് ലോറികളില്‍ കയറ്റി അയക്കുകയായിരുന്നു. ചെമ്മീന്‍ ചാകര വിവരമറിഞ്ഞ് വിവിധ പ്രദേശങ്ങളില്‍ നിന്ന് നൂറുകണക്കിനാളുകള്‍ അജാനൂര്‍ കടപ്പുറത്തേക്ക് ഒഴുകിയെത്തി. ചായിക്കാടന്‍, സാധുകൂട്ടര്‍ എന്നീ വലക്കാര്‍ക്കായിരുന്നു ഏറെയും ചെമ്മീനുകള്‍ ലഭിച്ചത്. മാര്‍ക്കറ്റുകളില്‍ വന്‍ വില ലഭിക്കുന്ന പൂവാലന്‍ വിഭാഗത്തില്‍പ്പെട്ട ചെമ്മീനുകളാണ് ഇവ. ചെമ്മീന്‍ ചാകര കടപ്പുറത്തെ ഉത്സവപ്രതീതിയിലാക്കി. കാലവര്‍ഷക്കെടുതിയിലെ വറുതിക്കിടെ എത്തിയ ചെമ്മീന്‍ ചാകര മത്സ്യത്തൊഴിലാളികളെ ആഹ്ലാദത്തിലുമാക്കി.
0 comments:
Post a Comment