കുഞ്ഞബ്ദുല്ലയുടെ കുടുംബത്തെ ദുരന്തം വേട്ടയാടുന്നു

കുഞ്ഞബ്ദുല്ലകാഞ്ഞങ്ങാട്: വിമാനാപകടത്തില്‍ മരിച്ച ഇഖ്ബാല്‍ ജംഗ്ഷനിലെ കമ്മാടം കുഞ്ഞബ്ദുല്ല ഹാജിയുടെ കുടുംബത്തെ ദുരന്തം വേട്ടയാടുന്നു. കുടുംബത്തിലെ മൂന്നുപേരുടെ അപകടമരണത്തിന്റെ വേദനമാറിക്കൊണ്ടിരിക്കുന്നതിനിടയിലാണ് ഹാജിയുടെ ദാരുണമരണം. കുഞ്ഞബ്ദുല്ലയുടെ മരുമക്കളാണ് മുമ്പ് അപകടത്തില്‍പെട്ട് മരിച്ചത്. സഹോദരി ദൈനബിയുടെ മകനും എഞ്ചിനീയറിങ്ങ് കോളേജ് വിദ്യാര്‍ത്ഥിയുമായ ഷിറാസ് പോണ്ടിച്ചേരിയിലും സഹോദരി ഷെറിനും മകന്‍ മുഹമ്മദും ഫുജൈറയിലും ഉണ്ടായ വാഹനാപകടത്തില്‍ മരിച്ചിരുന്നു. ഒന്നരവര്‍ഷം മുമ്പാണ് ഫുജൈറയില്‍ വാഹനാപകടം ഉണ്ടായത്. പൊലീസ് സൂപ്രണ്ട് പി. ഹബീബ് റഹ്മാന്റെ മകനുള്‍പ്പെടെ മരണപ്പെട്ട എഞ്ചിനീയറിങ്ങ് കോളേജ് വിദ്യാര്‍ത്ഥികളുടെ കൂട്ടത്തിലാണ് ഷിറാസും ഉണ്ടായിരുന്നത്. അഞ്ചുവര്‍ഷം മുമ്പായിരുന്നു അപകടം. കുഞ്ഞബ്ദുല്ലയുടെ ഉമ്മ കമ്മാടത്ത് മറിയുമ്മ ഒരുമാസം മുമ്പാണ് അന്തരിച്ചത്.അബുദാബിയിലെ അഡ്കോ കമ്പനിയിലെ ഉദ്യോഗസ്ഥനാണ് കുഞ്ഞബ്ദുല്ല. ബന്ധുവിന്റെ വിവാഹത്തില്‍ പങ്കെടുക്കാനാണ് നാട്ടിലേക്ക് തിരിച്ചത്.ഭാര്യ: റംല. മക്കള്‍: റിജുല, റഹില, റഷ, അബി പര്‍വീന്‍.മയ്യത്ത് വന്‍ ജനാവലിയുടെ സാന്നിധ്യത്തില്‍ തെക്കേപ്പുറം ജുമാമസ്ജിദില്‍ ഖബറടക്കി.