നാടന്‍ചൂലുകള്‍ നാടു നീങ്ങുന്നു; വിപണി പിടിക്കാന്‍ ആന്ധ്രക്കാര്‍

അജാനൂര്‍: നാടന്‍ചൂലുകള്‍ നാട്ടുമ്പുറങ്ങളില്‍നിന്നുപോലും അപ്രത്യക്ഷമായതോടെ മറുനാടന്‍ പുല്‍ചൂലുകളുമായി ആന്ധ്രക്കാര്‍ കൂട്ടത്തോടെയെത്തുന്നു. അജാനൂര്‍, കാഞ്ഞങ്ങാട്, കാസര്‍കോട്, പയ്യന്നൂര്‍ ഭാഗങ്ങളിലാണ് പുല്ലുകൊണ്ട് നിര്‍മിച്ച മനോഹര ചൂലുകളുമായി ആന്ധ്ര കച്ചവടക്കാര്‍ രംഗത്തെത്തിയത്.
ആന്ധ്രയില്‍നിന്ന് ലോറി മാര്‍ഗമാണ് ചൂലുകള്‍ കേരളത്തില്‍ എത്തിക്കുന്നത്. ഇത്തരം പുല്‍ചൂലുകള്‍ക്ക് മാര്‍ക്കറ്റില്‍ 40 മുതല്‍ 60 രൂപവരെ ഈടാക്കുന്നു. ടൈല്‍സ്, മാര്‍ബിള്‍ തുടങ്ങിയവ പാകിയ വീടുകളിലാണ് അധികമായി പുല്‍ചൂലുകള്‍ ഉപയോഗിക്കുന്നത്.
ആന്ധ്രാപ്രദേശിലെ മലയോര കുന്നുകളിലാണ് ഇത്തരം പുല്ലുകള്‍ ധാരാളമായുള്ളത്. ഇത് വെയിലത്ത് ഉണക്കിയെടുത്താണ് ചൂലുകള്‍ നിര്‍മിക്കുന്നത്. തുടര്‍ന്ന് പ്ലാസ്റ്റിക് പിടികളിലേക്ക് ഇറക്കിവെച്ച് ഉറപ്പിക്കുകയാണ് ചെയ്യുന്നത്. കഞ്ചൂര്‍ ചൂലുകള്‍ എന്നാണ് ആന്ധ്രക്കാര്‍ ഇതിനെ വിശേഷിപ്പിക്കുന്നത്. കേരളത്തില്‍ ഇത്തരം ചൂലുകള്‍ക്ക് ആവശ്യക്കാരേറെയാണെന്ന് ഇവര്‍ പറഞ്ഞു.

Madhyamam report