പെരുങ്കളിയാട്ടത്തിന്റെ സ്‌മരണ നിലനിര്‍ത്താന്‍ വൃക്ഷരക്ഷാ പദ്ധതി; വനം വകുപ്പ്‌ മന്ത്രി ഉദ്‌ഘാടനം ചെയ്യും

മാണിക്കോത്ത്‌: പെരുങ്കളിയാട്ടത്തിന്റെ സ്‌മരണ വരുംകാലങ്ങളില്‍ നിലനിര്‍ത്തുവാനും പോയകാലത്തിന്റെ ചരിത്രം അനാവരണം ചെയ്യുന്നതിനുമായി വൃക്ഷരക്ഷാ പദ്ധതി നടപ്പാക്കുന്നു. 150 വര്‍ഷത്തിനു ശേഷം പെരുങ്കളിയാട്ടം നടക്കുന്ന മാണിക്കോത്ത്‌ മാണിക്യമംഗലം പുന്നക്കല്‍ ഭഗവതി ക്ഷേത്ര ആഘോഷ കമ്മറ്റിയാണ്‌ ഈ ചരിത്ര പദ്ധതിക്ക്‌ തുടക്കം കുറിക്കുന്നത്‌. വനം വകുപ്പ്‌ മന്ത്രി ബിനോയ്‌ വിശ്വം ഡിസംബര്‍ എട്ടിന്‌ വൈകീട്ട്‌ മൂന്ന്‌ മണിക്ക്‌ ക്ഷേത്ര പരിസരത്ത്‌ വൃക്ഷരക്ഷാ പദ്ധതി ഉദ്‌ഘാടനം ചെയ്യും. പ്രകൃതിയും ഭൂമിയുമായുള്ള ആത്മബന്ധം ഊട്ടിയുറപ്പിക്കുന്നതിനും, വനസംരക്ഷണമെന്ന സന്ദേശം ജനങ്ങളിലെത്തിക്കുകയെന്ന ഉദ്ദേശത്തോടെയാണ്‌ വൃക്ഷരക്ഷാ പദ്ധതി നടപ്പാക്കുന്നതെന്ന്‌ ആഘോഷ കമ്മറ്റി ചെയര്‍മാന്‍ കെ.വേണുഗോപാലന്‍ നമ്പ്യാറും, ജന: കണ്‍വീനര്‍ എം.ജയചന്ദ്രനും അറിയിച്ചു. വൃക്ഷരക്ഷാപദ്ധതി ഉദ്‌ഘാടന ചടങ്ങില്‍ കെ.വി.കുഞ്ഞിരാമന്‍ എം.എല്‍.എ അദ്ധ്യക്ഷത വഹിക്കും. ആഘോഷ കമ്മിറ്റി കണ്‍വീനര്‍ വി.നാരായണന്‍ പദ്ധതി വിശദീകരിക്കും. പള്ളിപ്രം ബാലന്‍ എം.എല്‍.എ , നഗരസഭാ ചെയര്‍മാന്‍ എന്‍.എ.ഖാലിദ്‌, ബ്ലോക്ക്‌ പ്രസിഡണ്ട്‌ ബേബി ബാലകൃഷ്‌ണന്‍, പഞ്ചായത്ത്‌ പ്രസിഡണ്ട്‌ ചെറക്കോട്ട്‌ കുണ്ണിക്കണ്ണന്‍, എം.സി.ജോസ്‌, യൂസഫ്‌ ഹാജി എന്നിവര്‍ ആശംസാ പ്രസംഗം നടത്തും. http://www.kasaragodvartha.com